Aanar kåʹdd da Sääʹmteʹǧǧ kaaunõʹtte Meäʹcchalltõõzz njonnžin

14.11.2025

 Aanar kåʹdd da Sääʹmteʹǧǧ

Aanar kååʹdd da Sääʹmteeʹǧǧ eeʹttkõõʹsti kaaunõʹtte Meäʹcchalltõõzz njonnžin Heʹlssnest skamm-mannu 11. peeiʹv 2025 õhttsaž ouddõsǩiõččâmaaʹššivuiʹm.

Kaaunõõttmõõžžâst ǩiõttʼtõʹlleš aainâs energiamuõr haʹŋǩǩeem vueʹjj Aanrest. Luâđ ǩeâllʼjeei âânnmõš lij õhttsaž kõskksâjjsaž vueʹlǧǧemsââʹjjen Aanar kådda da Sääʹmtegga.

- Aanar kååʹdd energiaõhttõs Inergia Oy âânn õhttân pakkâzpuuʹtʼtem käivvan energia- da koiddmuõr, kååʹtt ij tieuʹd õllʼjab ǩiõttʼtõõllâmtääʹzz tääʹsskaiʹbbjõõzzid. Aanar kååʹddest põõrǥât še smiõttâd ođđ energiačåuddmõõžžid kookkas puäđlviʹžže, leša tän muʹrddemsââʹjest õõlǥči staanâd toiʹmmjummuž takai aarǥ lââʹssen še huâllam ainsmâttmõõžž ǩiõččmest, Aanar kåʹddjååʹđteei Tommi Kasurinen tuâtt.

Sääʹmteʹǧǧ tuäivv, što Meäʹcchalltõs piijči viõǥǥ Pâʹjj-Lappist muõrrčuõppâmpaaʒʒtõõzzi noorrma da vââžžai da nuõrr mieʹcci håiddma.

- Häʹrvveemčuõppmõõžž da vââžžai håiddmõš peäʹlstes vueiʹtlvââstče puäʒʒjânnmi maacctummuž, mii leʹčči samai vääžnai tän ääiʹj, kuäʹss äimmõsmuttâz vaaiktõõzz tuejjte vaʹǯǯtõõzzid puäʒʒhoiddu. Seämmast še pääiklaž energiamuõr vuäǯǯamvuõtt puârrneʹči, särnn Sääʹmteeʹǧǧ I väärrsaaǥǥjååʹđteei Leo Aikio.

Aanar kåʹddjååʹđteei Kasurinen späʹssbõõžži Meäʹcchalltõõzz tõʹst, što energiamuõr äuʹǩǩummuž kuõskki saǥstõõllmõõžžin õuddnummuš lij leämmaž miõttlõs.

- Tät lij raajjâm kudd vuâđ pueʹtti laauʹǩi plaanma õõutveäkka, särnn Aanar kåʹddjååʹđteei Tommi Kasurinen.

- Leäm toođvaž õhttsaž ouddõsǩiõččmõʹšše Aanar kooʹddin. Sääʹmteeʹǧǧ da Aanar kååʹdd jiõn kollʼje pueʹrben, ǥu viikkâp aaʹššid õõutveäkka õõudårra, tuâtt Sääʹmteeʹǧǧ I väärrsaaǥǥjååʹđteei Leo Aikio.

Kaaunõõttmõʹšše vuässõʹtte Meäʹcchalltõõzz väʹlddjååʹđteei Juha S. Niemelä, Meäʹcchalltõõzz Metsätalous Oy tååimtõsjååʹđteei Karoliina Niemi di äʹššneǩvuõttjååʹđteei Pasi Korteniemi, Aanar kåʹddjååʹđteei Tommi Kasurinen da väʹlddõõzz saaǥǥjååʹđteei Jari Huotari. Sääʹmteeʹǧǧest kaaunõõttmõʹšše vuässõʹtte I väärrsaaǥǥjååʹđteei Leo Aikio da saaǥǥjååʹđteei vieʹǩǩteei Anni-Saara Paltto.

Lââʹssteâđ

Aanar kåʹdd

Tommi Kasurinen
Kåʹddjååʹđteei
050 548 4123
tommi.kasurinen@inari.fi

Sääʹmteʹǧǧ

Leo Aikio
I väärrsaaǥǥjååʹđteei
040 621 6505
leo.aikio@samediggi.fi