Vuässõõtti budjetâsttmõš
 

Vuässõõtti budjetâsttmõš lij tåimmjemvueʹǩǩ, koʹst kåʹddneeʹǩǩ vääʹldet mieʹldd õhttsaž piiđvääʹrid kuõskki saǥstõõllmõʹšše, plaanummša da tuʹmmstõktuõjju. Tueʹǩǩen lij juurd vuõigg da vuässõõtti demokratiast, mâʹst aassi mieʹrree, mäʹhtt kååʹdd âânnmõõžžâst åårrai õõlmlaž vääʹrid ââʹnet. Vuässõõtti budjetâsttmõš oudd oummid vueiʹttemvuõđ meäʹrted da priorisâʹstted õõlmlaž ââʹnnemtäävtõõzzid. Seämmast tõt taʹrrjad takai meerla vueʹjj leeʹd tuõđi mieʹldd tuʹmmstõktuâjast. Vuässõõtti budjetâsttmõš lij õhtt nääʹll viikkâd ooudâs kåʹddniiʹǩǩi vuässadvuõđ.

Vuässõõtti budjetâsttmõʹšše ij leäkku pâi õhtt vuõigg mõõntõõllmõš, da tõn vuäitt čõõđted määŋgnalla. Aanar vuässõõtti budjetâsttmõõžžâst kååʹddneeʹǩǩ vuäiʹtte mieʹrreed, mäʹhtt 10 000 eeuʹr mieʹrrtieʹǧǧ ââʹnet.

Looǥǥ lââʹzz vuässõõtti budjetâsttmõõžžâst Kååʹddleett seeidain.

 

Aanar vuässõõtti budjetâsttmõõžžâst lie nellj poodd:

1. Eʹtǩǩõõzzi noorrmõš

Ǩii täättas vuäitt eʹtǩǩeed, mäʹhtt 10 000 euʹrred õõlǥči ââʹnned. Eʹtǩǩõõzz âʹlǧǧe leeʹd čõõđtemnalla 10 000 eeuʹr mieʹrrtieʹǧǧin, teâuddjed Aanrest da leeʹd kååʹdd tåimmvääʹldest da šeâttmõõžži da lääʹjjšeâttmõõžž meâldla.

2. Eʹtǩǩõõzzi valmstõõllmõš jiõnstummša

Kååʹddest ärvvtõõlât, mõõk eʹtǩǩõõzz lie ââʹnteei Seämmanallšem eʹtǩǩõõzzid õhtteet, da nåkam eʹtǩǩõõzzid jaukkeet, koid ij vueiʹt čõõđted 10 000 eeuʹr mieʹrrtieʹǧǧin leʹbe kook vueiʹtet čõõđted vueʹssen kååʹdd vuâđđtuâj. Jiõnstummša ouddneei eʹtǩǩõõzzid õlmstââʹttet.

3. Jiõnstummuš

Puk taʹnni 12 eeʹǩǩed tiuddeei da tõn puärrsab aanarneeʹǩǩ vuäiʹtte jiõnsted mõõn eʹtǩǩõõzz haaʹlee. Õhtt ooumaž vuäitt jiõnsted õʹhttešt.

4. Vuõiʹttieʹtǩǩõõzz leʹbe –eʹtǩǩõõzzi čõõđtummuš

Jäänmõsân jiõnid vuäǯǯam eʹtǩǩõs leʹbe eʹtǩǩõõzz čõõđtet mieʹrrtieʹǧǧi raamin. Eʹtǩǩõõzz čõõđtummuž vuäitt seuʹrrjed kååʹdd neʹttseeidain da sosiaalʼlaž media kanaalin.