Seuʹrrje tuʹmmstõktuâi
 

Kååʹddest tuʹmmjet jõnn mieʹrest jeeʹresnallšem aaʹššid, kook kuõskkte juõʹǩǩ kååʹddneeʹǩǩ aarǥ. Vueʹss tõin vaaikat vuõiʹǧǧest puki kåʹddniiʹǩǩi jeällma, vueʹss däs ouddmiârkkân õõut puõlvvõʹǩǩe meinnum kääzzkõõzzid leʹbe õõut Aanar kååʹdd vuuʹd kääzzkõõzzid.

Teâđ tuʹmmstõktuâjast vuäǯǯak veerjlaž kanaalin. Neeʹttest lie lookkâmnalla jeäʹrbi mieʹldd kåʹddväʹlddõõzz, kåʹddhalltõõzz da luʹvddkooʹddi  äʹššliist da påʹrddǩeeʹrj. Lââʹssen kååʹdd jeeʹres tåimmorgaani raajjâm tuʹmmstõõǥǥ käunnʼje  tuʹmmstõkloǥstõõǥǥin, koin teâđtet rajjum tuʹmmstõõǥǥin juʹn ouddâl ko såbbar påʹrddǩeʹrjj õlmstââʹttet.  Kååʹdd veʹrjjtuõʹllʼjeeji veʹrǧǧtuâjjan raajjâm tuʹmmstõõǥǥ käunnʼje veʹrjjtuõʹllʼjeeituʹmmstõõǥǥin. Kååʹdd neʹttseeidain käunnʼje lââʹssen  kååʹdd strategia, prograamm da plaan di täällarvvlõõzz, kook jååʹđte kååʹdd tåimmjummuž. 

Välddõõzz såbbri seuʹrrjummuš

Pââimõs mieʹrreemvääʹld kååʹddest âânn kåʹddväʹlddõs. Kåʹddväʹlddõõzz såbbar lie äävai pukid perstum oummid, da takainalla ǩii täättas vuäitt pueʹtted seuʹrrjed såbbar välddõskueʹrnca. Puk kåʹddväʹlddõõzz såbbar striiʹmjet juʹn-a video- leʹbe radiovuõlttõssân.

Välddõõzz såbbrid jäʹrjstet taaʹrb mieʹldd. Liiŋk såbbri seuʹrrjummša lââʹzztet kååʹdd neʹttseeidaid ouddseeid teâđtõõzzid.