Taan siijđost muštâluvvoo kieldâ já seervij ohtsâšpargo sierâ haamijn.

Serviehideh

Aanaar kieldâ uárnee ihásávt 2 - 3 servieehid, kuus puoh Anarist tuáimee seervih já servitooimâin perustum ulmuuh láá tiervâpuáttim. Serviehidijn tieđettuvvoo kieldâ viermisiijđoin já sosiaallii media oolijn, šleđgâpostáin sehe páihálâšaavis Inarilaisiist.

Serviehidij mittomeerrin lii jieŋâlmittiđ kieldâ já seervij sehe seervij koskâsii ohtsâšpargo. Lasseen serviehidij mittomeerrin lii lasettiđ tiätujotteem, jyehiđ feerimijd já kieđâvuššâđ ohtâsijd aašijd.

Torjuuh

Aanaar kieldâ mieđeet ihásávt torjuid aanaarlâš tâi Anarist tuáimee servijd, siärvusáid já priivaatulmuid. Stuárráámus uási kieldâ torjuin mieđettuvvojeh ihásávt algâive ornimnáál ohtâsii toorjâucâmist, mast mieđettuvvojeh kieldâ almostorjuuh, čuosâttâhtorjuuh já kyláseervij torjuuh. Lasseen kieldâ puáhtá mieđettiđ suogârdâllâmvuálásijd torjuid juátkojeijee ucâmist.

Luuvâ lase kieldâ torjuin liiŋkâi tääbbin.

Uđâsreivâ

Halijdah-uv uážžuđ šleđgâpoostân servijd čujottum uđâsreeivâ? Uđâsreivâ vuolgâttuvvoo suullân neljii ivveest. Tot fáálá tiäđu kieldâ já seervij koskâsii ohtsâšpargoost, torjuin já eres äigikyevdilis aašijn. Ohtâvuotâtiäđuh iä luovâttuu eres kiävtun.

Tiiláá seervij uđâsreeivâ tääbbin.

Kieldâ viistij kevttim

Kieldâ fáálá vistijdis seervij kiävtun válduášálávt mávsuttáá. Uásálâšvuotâkuávdáš Ainola visteh láá väärridmist seervij kiävtun mávsuttáá. Meiddei kieldâ lihâdemvisteh láá válduášálávt mávsuttemeh läiđejum vuárui kiävtun.

Luuvâ lase Uásálâšvuotâkuávdáš Ainola viistij väärridmist tääbbin.
Luuvâ lase kieldâ lihâdemviistijn tääbbin.

Kieldâ tábáhtuskalender

Seervih pyehtih almottiđ jieijâs tábáhtusâin já eres toimâinis kieldâ tábáhtuskalenderist.

Materiaaltoorjâ

Kieldâ puáhtá táárbu mield porgâđ servijd uccâ printtimpargoid, luoihâttiđ jienârustigijd já faallâđ eres västideijee materiaaltorjuu.

Hahâhaldâšem já väldikodálij torjui uuccâm

Kieldâ puáhtá išediđ seervijd hahâruttâdemucâmušâi tohâmist já hahâhaaldâšmist tagarijn haavâin, moh čyeccih seervij toimâmân. Kieldâ puáhtá meiddei uuccâđ väldikodálijd torjuid, moh čyeccih Aanaar kuávlust tuáimee seervij toimâmân.

Riäntuttes uánihisloovnah

Kieldâ puáhtá mieđettiđ servijd riäntuttes uánihisáigásijd loovnâid, moiguin puáhtá ovdâmerkkân mäksiđ hahâruttâdem jiešovdâsvástádâsuási.

Škovliittâsah servijd

Kieldâ uárnee servijd mávsuttes škovliittâsâid. Uási škovliittâsâin láá čujottum puoh servijd já uási tiätu syergi servijd, ovdâmerkkân valastâllâmservijd. Škovliittâsâin tieđettuvvoo kieldâ viermisiijđoin.

Puárásij- já vádulijparlamenteh, kylái rääđi

Aanaar kieldâ tuárju puárásij- já vádulijparlamentij tooimâid mäksimáin toi toimâkoloid. Puárásij- já vádulijparlamentijn lii serviovdâstem. Kieldâ tuárju kylái rääđi toimâm falâmáin rääđi kiävtun čällee já čuákánkoččoo.

Luuvâ lase puárásijparlament já vádulijparlament tooimâin.

Serviohtâvuotâolmooš seervij toorjân

Kieldâ serviohtâvuotâulmuu paargon kulá kieldâst tuáimee servijguin porgâmnáál ohtsâšpargo. Serviohtâvuotâolmooš koordinist seervij já kieldâ koskâsii ohtsâšpargo, tuálá ohtâvuođâ servijguin, rävvee seervijd jieškote-uvlágán aašijn sehe uárnee puoh kieldâ servijd čujottum serviehidijd.

Lasetiäđuid kieldâ já seervij ohtsâšpargoost addel pyereestvaijeemkoordinaattor.

Torjuuh servijd, siärvusáid já eres tuáimeid

Kieldâ mieđettem torjuiguin tuárjuh aanaarlijd servi- já siiviiltooimâid sehe movtijditeh kieldâlijd siärvuslâš toimâmân.

Torjuid puáhtá mieđettiđ aanaarlâš tâi Anarist tuáimee servijd, vuáđudâssáid já priivaatulmuid. Kieldâ mieđeet torjuid ihásávt kevttimist leijee meriruuđâi raamij siste. Váldu-uási kieldâ torjuin mieđettuvvojeh ihásávt ohtâsii toorjâucâmist, mii uárnejuvvoo ohtii ivveest algâive.
 
Ohtâsii toorjâucâmist mieđettemnáál torjuuh láá

• almostoorjâ registeristum seervi tâi vuáđudâs oles ive toimâmân (mield vuáđutooimah, tábáhtusah, haavah, skappumeh je. njuolgâdusâi miäldásâš toimâm).
• čuosâttâhtoorjâ tábáhtus, skappum, haavâ tâi eres kerdiluándusii tooimâ olášutmân. Puáhtá mieđettiđ talle, jis occee ij uusâ tâi uážu almostorjuu.
• kyláseervij toorjâ Anarist tuáimee registeristum kyláseervi oles ive toimâmân.

Lasseen ohtâsii toorjâuuccâm maŋa kieldâ puáhtá mieđettiđ juátkojeijee ucâmist suogârdâllâmvuálásii torjuu taggaar tábáhtus, skappum, haavâ tâi eres kerdiluándusii tooimâ olášutmân, moos ij agâstâllum suujâst lah lamaš máhđulâš uuccâđ torjuu ohtâsii toorjâucâmist.

Oovtâ torjuu occei puáhtá válduášálávt mieđettiđ tuše oovtâlágán torjuu. Kyláservijd puáhtá agâstâllum suujâst mieđettiđ kyláseervi torjuu lasseen čuosâttâhtorjuu tâi suogârdâllâmvuálásii torjuu.
 
Toorjâvuáválâšvuođah valdâluvvojeh tärhibeht kieldâ toorjâravvuin.