Gieldda ja servviid ovttasbargu

Dán siiddus muitaluvvo gieldda ja organisašuvnnaid ovttasbarggu hámiin.

Searveeahkedat

Anára gielda ordne jahkásaččat 2-3 searveeahkeda, gosa sáhttet searvat buot Anáris doaibmi searvvit ja searvedoaimmas beroštuvvan. Searveeahkediin dieđihuvvo gieldda neahttasiidduin ja sosiála media kanálain, šleađgapoasttain ja báikkálašbláđđi Inarilainenis.

Searveeahkediid ulbmilin lea čiekŋudit gieldda ja servviid ja maiddái servviid gaskasaš ovttasbarggu. Lassin searveeahkediid ulbmilin lea lasihit dieđujohtima, juohkit vásáhusaid ja gieđahallat oktasaš áššiid.

Doarjagat

Anára gielda mieđiha jahkásaččat doarjagiid anárlaš dahje Anáris doaibmi servviide, servošiidda ja priváhtaolbmuide. Stuorámus oassi gieldda doarjagiin mieđihuvvo jahkásaččat álgojagi oktasaš doarjjaozus, mas mieđihuvvojit gieldda oppalaš doarjagat, čuozáhatdoarjagat ja giliservviid doarjagat. Lassin gielda sáhttá mieđihit guorahallanvuloš doarjagiid bissovaš ozus.

Loga lasi gieldda doarjagiin dáppe.

Ođasreive

Háliidatgo oažžut šleađgapoastasat servviide dárkkuhuvvon ođasreivve? Ođasreive sáddejuvvo sullii njeallje háve jagis. Dat fállá dieđu gieldda ja servviid gaskasaš ovttasbarggus, doarjagiin ja eará áigeguovdilis áššiin. Oktavuođadieđuid eat luobat eará geavahussii.

Diŋgo servviid ođasreivve dáppe.

Gieldda sajiid geavaheapmi

Gielda fállá sajiidis servviid geavahussii dábálaččat nuvttá. Osolašvuođaguovddáš Ainola  sajiid sáhttá várret servviid geavahussii nuvttá. Maiddái gieldda lihkadansajit leat dábálaččat nuvttá jođihuvvon vuoruid geavahussii.

Loga lasi Osolašvuođaguovddáš Ainola sajiid várremis dáppe.
Loga lasi gieldda lihkadansajiin dáppe.

Gieldda dáhpáhuskaleandar

Searvvit sáhttet almmuhit iežas dáhpáhusain ja eará doaimmain gieldda dáhpáhuskaleandaris.

Materiáladoarjja

Gielda sáhttá dárbbu mielde bargat servviide unnahámát printenbargguid, luoikkahit jienageardunrusttegiid ja fállat eará vástideaddji materiáladoarjaga.

Fidnohálddašeapmi ja váldegottálaš doarjagiid ohcan

Gielda sáhttá veahkehit servviid fidnoruhtadanohcamušaid dahkamis ja fidnohálddašeamis dakkár fidnuin, mat čuhcet searvvi doaimmaide. Gielda sáhttá maiddái ohcat váldegottálaš doarjagiid, mat čuhcet Anára guovllus doaibmi servviid doaibmamii.

Reanttuhis oanehisloanat

Gielda sáhttá mieđihit servviide reanttuhis oanehisloanaid, main sáhttá ovdamearkan máksit fidnoruhtadeami iešgoasttidanoasi.

Skuvlejumit servviide

Gielda ordne servviide nuvttá skuvlejumiid. Oassi skuvlejumiin lea oaivvilduvvon buot servviide ja oassi dihto suorggi servviide, ovdamearkan faláštallanservviide. Skuvlejumiin dieđihuvvo gieldda neahttasiidduin.

Vuorrasiid- ja lápmásiidstivra, giliid ráđđi

Gielda doarju vuorrasiid- ja lápmásiidstivrraid doaibmama nu, ahte máksá daid doaibmangoluid. Vuorrasiid- ja lápmásiidstivrrain lea organisašuvdnaovddastus. Giliid ráđi doaibmama gielda doarju nu, ahte fállá ráđi geavahussii čálli ja čoahkkáibovdejeaddji.

Loga lasi vuorrasiidstivrra ja lápmásiidstivrra doaimmas.

Organisašuvdnakontáktaolmmoš servviid doarjjan

Gieldda organisašuvdnakontáktaolbmo bargogovvii gullá gielddas doaibmi organisašuvnnaiguin dahkkojuvvon ovttasbargu. Organisašuvdnakontáktaolmmoš koordinere organisašuvnnaid ja gieldda gaskasaš ovttasbarggu, doallá oktavuođa organisašuvnnaide, rávve organisašuvnnaid iešguđetlágan áššiin ja ordne buohkaide gieldda organisašuvnnaide oaivvilduvvon searveeahkediid.

Lassedieđu gieldda ja organisašuvnnaid ovttasbarggus addá buresveadjinkoordináhtor.

Doarjagat ovttastusaide, servošiidda ja eará doibmiide

Gieldda mieđihan doarjagiiguin doarjut anárlaš searve- ja álbmotdoaimma ja roahkasmahttit gieldalaččaid servvodatlaš doibmii.

Doarjagiid sáhttit mieđihit anárlaš dahje Anáris doaibmi servviide, foanddaide, servošiidda ja olbmuide. Gielda mieđiha doarjagiid jahkásaččat geavahusas leahkki mearreruđaid mielde. Váldooassi gieldda doarjagiin mieđihuvvo oktasaš doarjjaozus, mii ordnejuvvo oktii jagis álgojagis.

Oktasaš doarjjaozus mieđihit doarjagiid:

• oppalaš doarjja registrerejuvvon searvvi dahje foandda olles jagi doaibmamii (lohkkojuvvo mielde vuođđodoaibma, dáhpáhusat, fidnut, háhkamušat jed. doaibma njuolggadusaid mielde)
• čuozáhatdoarjja dáhpáhusa, háhkamuša, fidnu dahje eará geardelunddot doaimma ollašuhttimii. Sáhttá mieđihuvvot dalle, juos ohcci ii oza dahje oaččo oppalaš doarjaga.
• giliservviid doarjja Anáris doaibmi registrerejuvvon gilisearvvi olles jagi doaibmamii.

Lassin oktasaš doarjjaozu maŋŋá gielda sáhttá mieđihit bissovaš ozus guorahallanvuloš doarjaga dakkár dáhpáhusa, háhkamuša, fidnu dahje eará geardelunddot doaimma ollašuhttimii, masa ii ákkastallojuvvon siva geažil lean vejolaš ohcat doarjaga oktasaš doarjjaozus.

Ovtta doarjaga ohccái sáhttá dábálaččat mieđihit dušše ovttalágan doarjaga. Giliservviide sáhtit ákkastallojuvvon sivas mieđihit giliservviid doarjaga lassin čuozáhatdoarjaga dahje guorahallanvuloš doarjaga.

Doarjjageavadagain muitaluvvo dárkileappot gieldda doarjjarávvagiin.