Aanaar kieldâ já Sämitigge juátkih oovtâstpargoteivâdmijd - äššilistoost eereeb iärrás sämikielâlii arâšoddâdem já máttááttâs ruttâdem turvim

08.09.2025

Aanaar kieldâ já Sämitigge

Aanaar kieldâ já Sämitige ovdâsteijeeh teivâdii čohčâmáánu 3. peeivi 2025 Avelist kieldâtáálust ohtsii hiäđukocceem já oovtâstpargo ovdedem juátkim ooleest. Merikoskâsij teivâdmij orniimist lii soppum vuossâmuu oovtâstpargoteivâdem ohtâvuođâst ive 2023.

Taan tove teivâdmist ohtsii hiäđukocceem kuávdáást lijjii eromâšávt sämikielâlii arâšoddâdem já máttááttâs ruttâdem turvim. Savâstâlmijn kuávdáást lijjii eenikielâlâš arâšoddâdem já kielâpiervâltoimâ, tastko puáttee ive láá staatâtorjuid puátimin nubástusah, moh vaigutteh sämikielâlii arâšoddâdem staatâtorjui.

Aanaar kieldâst kiävttojeh suomâkielâ paaldâst virgálávt puoh kulmâ Suomâst sarnum sämikielâ; anarâškielâ, nuorttâlâškielâ já tavesämikielâ. Teivâdmist lijjii siämmáá uáivilist tast, ete sämikielâi eellimvuáimálâšvuođâ turvim váátá meritiätulii oovtâstpargo já tuárvi resursijd.

Čuákkimist kieđâvuššii meid iäláttâssáid, eennâmkevttimân já šiev aalmugkoskâvuođáid lohtâseijee äigikyevdilijd aašijd sehe pyereestvaijeemaašijd. Ohtsii hiäđukocceem čuosâttâhhân lii ain Poka maađij ađai Aanaar já Kittâl koskâsii kuávlumaađij 955 vuáđutivvoom.

Lasseen suogârdâllii konkreetlijd oovtâstpargovuovijd puátteevuođâst. Uásipeleh oovdânpuohtii haalus juátkiđ teivâdmijd já ovdediđ ain oovtâstpargo.

– Lii tehálâš savâstâllâđ ávus mieláin merikoskâsávt Sämitige já Aanaar kieldâ kooskâ ei. palvâlusâi orniimist já luándun lohtâseijee teemain. Puátteevuođâst lii eromâš tehálâš oovtâst turviđ sämikielâlii arâšoddâdem, vuáđumáttááttâs já eres palvâlusâi staatâst finnejum ruttâdem sämikuávlu kieldâin, iätá Aanaar kieldâhovdâ Tommi Kasurinen.

– Sämmilij päikkikuávlu kieldâi rooli lii tehálâš tast, maht sämmilij vuoigâdvuođah olášuveh keevâtlávt. Mun lam ilolâš tast, ete mist lii Aanaar kieldáin ohtsâš táttu ovdediđ tooimâ já nanodiđ oovtâstpargo, iätá I värisaavâjođetteijee Leo Aikio.

Čuákkimân uásálistii Aanaar kieldâst kieldâ váldustiivrâ saavâjođetteijee Jari Huotari, kieldâstiivrâ 1. värisaavâjođetteijee Anu Avaskari, kieldâhovdâ Tommi Kasurinen sehe sierâ toimâsuorgij virgeolmoošnjunošeh. Sämitiggeest čuákkimân uásálistii kieldâoovtâstpargoost Sämitiggeest västideijee I värisaavâjođetteijee Leo Aikio já haldâttâhhovdâ Pia Ruotsala-Kangasniemi sehe sierâ toimâsuorgij virgeulmuuh.

Lasetiäđuh

Aanaar kieldâ

Tommi Kasurinen
Kieldâhovdâ
050 548 4123
tommi.kasurinen@inari.fi

Sämitigge

Leo Aikio
I värisaavâjođetteijee
040 621 6505
leo.aikio@samediggi.fi