Aanaar kieldâ já Sämitigge teivâdii Meccihaldâttâs njunošijguin

14.11.2025

Aanaar kieldâ já Sämitigge

Aanaar kieldâ já Sämitige ovdâsteijeeh teivâdii Meccihaldâttâs njunošijguin Helsigist skammâmáánu 11. peeivi 2025 ohtsij hiäđukocceemašijguin.

Teivâdem fáddán lâi eromâšávt energiamuorâ haahâm Anarist. Luándu kilelis kevttim lii Aanaar kieldân já Sämitiigán tehálâš vuolgâsaje.

- Aanaar kieldâ energiafinnodâh Inergia Oy kiävttá ohtân liegâdempyevtittem kälden energia- já sáigumuorâ, mii ij teevdi aaleeb jáludemtääsi kvaliteetvátámâšâid. Aanaar kieldâst viggeh smiettâđ uđđâ energiačuávdusijd meid kuhás puátteevuotân, mutâ taan jorgáldâhmuddoost kolgâččij turviđ toimâm táválii aargâ lasseen meid huolâttâsvisesvuođâ uáinust, Aanaar kieldâhovdâ Tommi Kasurinen paahud.

Sämitigge tuáivu, ete Meccihaldâttâs piejâččij Paje-Laapist naavcâid čuoppâmpasâttâsâi nurâmân já vašij já nuorâ vuovdij tipšomân.

- Njárbudemčuoppâmeh já vašij tipšom tovâččij jieijâs uásild máhđulâžžân puásuikuátumij oovdeb tilán macâttem, mii ličij eromâš tehálâš taan ääigi, ko šoŋŋâdâhnubástus vaikuttâsah tovâtteh hástusijd puásuituálun. Siämmást meid páihálii energiamuorâ finnimvuotâ puáráničij, iätá Sämitige I värisaavâjođetteijee Leo Aikio.

Aanaar kieldâhovdâ Kasurinen kiijtij Meccihaldâttâs tast, ete savâstâlmijn, moh kyeskih energiamuorâ kevttimân, ovdánem lii lamaš positiivlâš.

- Taat lii adelâm šiev vuáđu čuávuvái laavhij vuáváámân oovtâst, iätá Aanaar kieldâhovdâ Tommi Kasurinen.

- Mun lam tuđâvâš ohtsii hiäđukocemân Aanaar kieldáin. Sämitige já Aanaar kieldâ jienah kullojeh pyerebeht, ko mij tuálvup aašijd oovtâst ovdâskulij, paahud Sämitige I värisaavâjođetteijee Leo Aikio.

Teivâdmân uásálistii Meccihaldâttâs válduhovdâ Juha S. Niemelä, Meccihaldâttâs Metsätalous Oy toimâttâshovdâ Karoliina Niemi sehe äššigâsjođetteijee Pasi Korteniemi, Aanaar kieldâhovdâ Tommi Kasurinen já váldustiivrâ saavâjođetteijee Jari Huotari. Sämitiggeest teivâdmân uásálistii I värisaavâjođetteijee Leo Aikio já saavâjođetteijee išedeijee Anni-Saara Paltto.

Lasetiäđuh

Aanaar kieldâ

Tommi Kasurinen
Kieldâhovdâ
050 548 4123
tommi.kasurinen@inari.fi

Sämitigge

Leo Aikio
I värisaavâjođetteijee
040 621 6505
leo.aikio@samediggi.fi