Anára gieldda buresveadjin- ja dorvvolašvuođaplána 2026–2029 sáhttá kommenteret 24.4.2026 rádjai

05.03.2026

Buresveadjin- ja dorvvolašvuođaplána 2026–2029 lea gieldda sierra doaibmasurggiid ja čanusjoavkkuid ovttasráđiid ráhkadan plána, mii sisttisdoallá mihttomeriid ja doaibmabijuid gieldda olbmuid buresveadjima ja árgga dorvvolašvuođa ovddideami várás.

Buresveadjin- ja dorvvolašvuođamuitalusa 2021–2024 vuođul gávnnahuvvon anárlaččaid guovddáš buresveadjin- ja dorvvolašvuođahástalusat gullet miela buresveadjimii, eallinvugiide ja árgga dorvvolašvuhtii. Buresveadjin- ja dorvvolašvuođaplána 2026–2029 deattuhussan leat válljejuvvon:

Miela buresveadjin

Miela buresveadjimii váikkuhit earret eará vejolašvuohta ollašuhttit iežas doaimmaid ja oassálastit alcces dehálaš áiggeájiide, vejolašvuohta váikkuhit áššiide, mat gusket alcces, ja vásáhusat das ahte lea vuoigatvuohta ovdanbuktit iežas oainnu, áddehallat ja dohkkehuvvot dakkárin go ieš lea. Buorit olmmošgaskavuođat ja dorvvolaš ja njuovžilis árga leat dehálaš áššit, mat dorjot miela buresveadjima. Dáidda, kultuvra, girjerádjobálvalusat ja hutkás doaibma ovddidit miela buresveadjima. Iešguđetlágan addikšuvnnat heajosmahttet miela buresveadjima.

Dearvvašlaš eallinvuogit ja liigedeattu eastadeapmi

Dearvvašlaš eallinvugiide gullet máŋggabealat ja dearvvašlaš borramuš ja jeavddalaš borranritma, máŋggabealat ja ávžžuhusaid mielde lihkadeapmi, ahte vuoiŋŋasta doarvái ja čoaggá fámuid ja maid sosiálalaš gulahallan. Gárrenávdnasat, nikotiidnabuktagat ja gárihuhttinávdnasat ja maid iešguđetlágan addikšuvnnat heajosmahttet dearvvašvuođa. Liigedeaddu lea riskadahkki máŋggaide buohcuvuođaide dego tiipa 2 diabetesii ja váibmo- ja várrasuotnabuohcuvuođaide. Liigedeattu sáhttá eastadit go doarju dearvvašlaš eallinvugiid ja miela buresveadjima.

Árgga dorvvolašvuohta

Árgga dorvvolašvuohta lea viiddes doaba, mii gokčá earret eará sierra birrasiid fysalaš dorvvolašvuođa ja lihkohisvuođaid ovddalgihtii eastadeami, digitála dorvvolašvuođa, johtolatdorvvolašvuođa ja psyhkalaš ja sosiálalaš dorvvolašvuođa. Árgga dorvvolašvuohta ii leat dušše rihkkosiid dahje lihkohisvuođaid váilun, muhto oppalašvuohta, mas olmmoš vásiha ahte lea dorvvus sihke fysalaččat, psyhkalaččat ja sosiálalaččat.

Ovdalis ovdanbukton buresveadjin- ja dorvvolašvuođaplána deattuhusat leat máŋggabealat áššit, mat váikkuhit oassái nuppiidasaset. Go váikkuha buot dáidda oassedahkkiide, sáhttá buoremusat ovddidit gieldda olbmuid buresveadjima.

Buresveadjin- ja dorvvolašvuođaplána hámus lea dál albmosis gieldda neahttasiidduin. Plána birra sáhttá gii beare ovdanbuktit iežas oaiviliid vulobeale liŋkka bokte dahje nu, ahte sádde friijahápmásaš cealkámuša gieldda girjenkantuvrii inari@inari.fi maŋimustá 24.4.2026.

Oahpásmuva plánii dás: Anára gieldda buresveadjin- ja dorvvolašvuođaplána 2026–2029

Kommentere plána dás: Kommentere

Lassedieđut: leena.korhonen@inari.fi / 040 643 4305