Anára gielda ja Sámediggi deaivvadedje Meahciráđđehusa njunnošiiguin

14.11.2025

 Anára gielda ja Sámediggi

Anára gieldda ja Sámedikki ovddasteaddjit deaivvadedje Meahciráđđehusa njunnošiiguin Helssegis skábmamánu 11. beaivve 2025 oktasaš ovdogohccináššiin.

Deaivvadeamis gieđahallojuvvui erenomážit energiijamuora háhkama dilli Anáris. Luonddu suvdilis geavaheapmi lea Anára gildii ja Sámediggái guovddáš vuolggasadji.

- Anára gieldda energiijafitnodat Inergia Oy atná lieggasa buvttadeami gáldun energiija- ja sárasmuora, mii ii deavdde alit gárvvistandási kvaliteahtagáibádusaid. Anára gielddas ođđa energiijačovdosiid geahččalit smiehttat maiddái guhkás boahttevuhtii, muhto dán nuppástusas galggašii dorvvastit doaimma dábálaš árgga lassin maiddái fuolahussihkkarvuođa perspektiivvas, Anára gielddahoavda Tommi Kasurinen gávnnaha.

Sámediggi sávvá, ahte Meahciráđđehus bijašii deattu Badje-Lappis vuovdenjáskamiid bázahasaid čoaggimii ja vesáeatnamiid ja nuorra vuvddiid dikšumii.

- Njárbudančuohppamat ja vesáeatnamiid dikšun attášedje vejolašvuođa dan oasil buoridit guohtuneatnamiid, mii livččii hui dehálaš dán áiggis, mas dálkkádatnuppástusa váikkuhusat dagahit hástalusaid boazodollui. Seamma áigge maiddái báikkálaš energiijamuora oččošii buorebut, dadjá Sámedikki I várreságajođiheaddji Leo Aikio.

Anára gielddahoavda Kasurinen giittii Meahciráđđehusa das, ahte ságastallamat energiijamuora ávkkástallamis leat ovdánan positiivvalaččat.

- Dát lea láhčán buori vuođu čuovvovaš lávkkiid plánemii ovttas, dadjá Anára gielddahoavda Tommi Kasurinen.

- Lean duđavaš oktasaš ovdogohcimii Anára gielddain. Sámedikki ja Anára gieldda jienat gullojit buorebut, go mii ovddidit áššiid ovttas, gávnnaha Sámedikki I várreságajođiheaddji Leo Aikio.

Deaivvadeapmái oassálaste Meahciráđđehusa oaivehoavda Juha S. Niemelä, Meahciráđđehusa Metsätalous Oy beaivválaš jođiheaddji Karoliina Niemi ja áššehasvuođajođiheaddji Pasi Korteniemi, Anára gielddahoavda Tommi Kasurinen ja váldostivrra ságajođiheaddji Jari Huotari. Sámedikkis deaivvadeapmái oassálasttiiga I várreságajođiheaddji Leo Aikio ja ságajođiheaddji veahkkebargi Anni-Saara Paltto.

Lassedieđut

Anára gielda

Tommi Kasurinen
Gielddahoavda
050 548 4123
tommi.kasurinen@inari.fi

Sámediggi

Leo Aikio
I várreságajođiheaddji
040 621 6505
leo.aikio@samediggi.fi