Sääʹmǩiõllsa mättmateriaal lie ååʹn õlmstõttum

21.10.2025

Oummu rââst raaj – People cross the borders -haʹŋǩǩõõzzâst tuejjuum sääʹmǩiõllsa mättmateriaal lie ååʹn õlmstõttum! Aanar kååʹdd čuõvtemtååim vueʹlnn toiʹmmjeei haʹŋǩǩõs Oummu rââst raaj – People cross the borders õlmstõõʹtti sääʹmǩiõllsaž mättmateriaalid Sääʹmǩiõli neäʹttel cisttân täʹbbe mââibaarǥ 21.10.2025.

Kartt: Oummu rââst raaj – People cross the borders -haʹŋǩǩõõzzâst tuejjuum sääʹmǩiõllsa mättmateriaal

Sääʹmǩiõl da kulttuur oouʹdummša vuäjjneei haʹŋǩǩõõzz õlmstâʹttem sääʹmǩiõllsa mättmateriaal lie puki ââʹnnmest. Materiaal käunnʼje Aanar kååʹdd neʹttseeidain, čuõvtemkääzzkõõzzi vueʹlnn käunnʼjeei haʹŋǩǩõõzz jiijjâs seeidast. Mââibaarǥ 21.10.2025 čiâss 15:00 materiaalin ââʹnet lääddas čuäʹjtempoodd sääʹmǩiõl mättʼtõõzzâst õõʹnni uʹčteeʹlid da ouddpeâmm tuâjjlaid Teams-õhttvuõđin. Kååčč šõddmõʹšše leät vuõlttääm täävtõsjouʹǩǩe vuõiʹǧǧest neʹttpooʹštin. Jõs jiõk leäkku vuäǯǯam kååčč da ǩiõččlââstak šõddmõõžž tuʹnne taarbliʹžžen, vääʹld sõõrǥab õhttvuõđ õhttvuõttooumže, koon õhttvuõtt-teâđ käunnʼje vuâlpeäʹlnn.

Õlmstõttum mättmateriaal lie jurddum sääʹmǩiõllsaž ouddpiõmmu da vuâđđškooulmättʼtõʹsse di sääʹmǩiõl lääʹdd- da taarǩiõllsaž mättʼtõʹsse. Jåårǥlõõzzid seʹst õõʹnni materiaal lie âʹtte jåårǥlõttum nuʹtt lääʹdd- ko še taarǩiõʹlle. Materiaalid vuäitt ââʹnned še jeeʹres ij-kaauplaž mieʹrid, ouddmiârkkân privatt ââʹnnmest.

Materiaal lie juõkkum digitaalʼlaž da fyyslaž materiaalid. Fyyslaž materiaal lie juõkkum mošttspeâllaid, ǩiiʹrjid di plakaattid da jeeʹres tiâddum materiaalid. Kaaunak materiaalid addrõõzzâst Sääʹmǩiõllsa mättʼtem-materiaal - INARI.FI, koʹst kaaunak nuʹtt liiŋkid digitaalʼlaž materiaalid ko še priʹnttjemnallšem teâttõõzzid PDF-hääʹmest.

Kartt: kovvǩeʹrjj nuõrttsääʹmǩiõʹlle

Oummu rââst raaj – People cross the borders -haʹŋǩǩõs lij mieʹldd Aanar kååʹdd sääʹmǩiõllkaaʹffpõõrtâst neljdpeeiʹv 23.10.2025 čiâss 14–16 Kaarre-škooul- da kulttuurkõõskõõzzâst Âʹvvlest. Haʹŋǩǩõs puätt čuäjtõõllâd da jueʹǩǩed måtam mättmateriaalid. Vuäitak pueʹtted tobdstõõttâd materiaalid pääiʹǩ ool leʹbe kõõččâd miõl väiʹvveei kõõččmõõžžid õhttneeʹl juʹn-a jiõčč mättmateriaalid leʹbe haʹŋǩǩõõzz tååimaid.

Tuäivtep rämmas mättjempooddid materiaalivuiʹm!

Sääʹmǩiõllsa mättʼtem-materiaal

Õhttvuõttooumaž:
Lempi Lehtinen,
haʹŋǩǩõstuâjjlaž,
lempi.lehtinen@inari.fi