Aanar kååʹdd puârastvââjjam- da staanlažvuõttplaan 2026–2029 kommentâʹsttemnalla 24.4.2026 räjja

05.03.2026

Puârastvââjjam- da staanlažvuõttplaan 2026–2029 lij kååʹdd jeeʹres tåimmsuõʹrji da čõõnâsjoouki õhttsažtuâjast raajjâm plaan, kååʹtt âânn seʹst täävtõõzzid da tååimaid kåʹddniiʹǩǩi puârastvââjjmõõžž da aarǥ staanlažvuõđ ooudâsviikkmõššân.

Puârastvââjjam- da staanlažvuõttčiõlǥtõõzz 2021–2024 vuâđald toobdstum aanarniiʹǩǩi kõskksummuž puârastvââjjam- da staanvuõttvaʹǯǯtõõzz õhttne miõl puârastvââjjmõʹšše, jieʹllemnaaʹlid di aarǥ staanlažvuõʹtte. Puârastvââjjam- da staanlažvuõttplaan 2026–2029 teäddpäiʹǩǩen lij vaalšum:

Miõl puârastvââjjmõš

Miõl puârastvââjjmõʹšše vaaikat jeäʹrbi mieʹldd vueiʹtlvažvuõtt čõõđted jiijjâz da vuässõõttâd jiõccses vääžnai staarjõõzzid, vueiʹtlvažvuõtt vaaikted jiijjâz kuõskki aaʹššid da tobddâd, što suu kuvddlet, fiʹttjet da seänat nåkkmen ǥu son lij. Pueʹrr ooumažkõskkvuõđ di staanlaž da soojji argg liâ vääžnai miõl puârastvââjjmõõžž tueʹrjjeei raajji. Čeäppõs, kulttuur da kreevsõs tåimmjummuš oouʹdee miõl puârastvââjjmõõžž. Jeeʹresnallšem čõõnâsvuõđ rââʹžžee miõl puârastvââjjmõõžž.

Tiõrvvsallaž jieʹllemnääʹl da leiʹǧǧteädd cõggmõš

Tiõrvvsallaž jieʹllemnääʹl nårrje määŋgbeällsaž da tiõrvvsallaš porrmõõžžâst da mieʹrrkõskksaž poorrâmääiʹjest, määŋgbeällsaž da siâzztõõzzi meâldlaž liikkummšest, riʹjttjeei vuâŋŋmõõžžâst da virkkõõvvmõõžžâst mååusat di sosiaalʼlaž vuârrvaaiktõõzzâst. Vuäivvõõttâmaunnâz, nikotiinaunnâz da narkoottla aunnâz di jeeʹresnallšem čõõnâsvuõđ rââʹžžee tiõrvâsvuõđ. Leiʹǧǧteädd lij riskkraajji määŋgaid kõõvid diǥu tyypp 2 diabeeʹtteʹsse di čââʹđ- da võrrsuõnnkõõvid. Leiʹǧǧteädd vueiʹtet cõggâd tueʹrjjeeʹl tiõrvvsallaž jieʹllemnaaʹlid di miõl puârastvââjjmõõžž.

Aarǥ staanlažvuõtt

Aarǥ staanlažvuõtt lij veiddsõs fiʹttõs, kååʹtt kätt jeeʹrab mieʹldd jeeʹres pirrõõzzi fyyslaž staanlažvuõđ da paaʹrti ooudbeäʹlnn cõggmõõžž, digitaalʼlaž staanlažvuõđ, jååttlõkstaanlažvuõđ di psyyklaž da sosiaalʼlaž staanlažvuõđ. Aarǥ staanlažvuõtt ij leäkku tåʹlǩ åårrmõš reäkkõõzzitaa leʹbe paaʹrtitaa, pâi obbvuõtt, koʹst ooumaž tåbdd åårram tuõrvâst nuʹt fyyslânji, psyyklânji ǥu sosiaalʼlânji.

Ooudbeäʹlnn eʹtǩǩuum pueʹrrvââjjam- da staanlažvuõttplaan teäddpääiʹǩ liâ vuäzzas nuuʹbbeez vaaikteei, määŋgtaakkâž raajji. Vaaikteeʹl pukid täid vueʹssraajjʼjid, vueiʹtet pueʹrmõssân oouʹdeed kåʹddniiʹǩǩi puârastvââjjmõõžž.

Puârastvââjjam- da staanlažvuõttplaan häämas lij ååʹn vueiʹnnemnalla kååʹdd neʹttseeidain. Plaanâst vuäitt ǩii täättas ehdted vuäinnmõõžžeez vueʹlnn åårrai liiŋk pääiʹǩ leʹbe vuõltteeʹl pååđmallsaž ciâlkâlm kååʹdd ǩeeʹrjeempäikka inari@inari.fi 24.4. mõõneeʹst.

Tobdstõõđ plaaʹne täʹst: Aanar kååʹdd puârastvââjjam- da staanlažvuõttplaan 2026–2029

Kommentâstt plaan täʹst: Kommentâstt

Lââʹssteâđ: leena.korhonen@inari.fi / 040 643 4305