Guolledoallofoanda

Jagi 1985 rájes doaibman Anára gieldda guolledoalu ovddidanfoanda sirrejuvvui jagi 2007 álggus gieldda eará váriidgeavaheamis iežas balánsaovttadahkan. Foandda doaibma vuođđuduvvá Ruošša ja Norgga jagiin 1985-2005 máksin Anárjávrri dulvadanhehttehusaid buhtadusruđaide ja dain ožžojuvvon reantoboađuide.

Foandda bargun lea Anára gieldda ja eana- ja meahccedoalloministeriija gaskasaš soahpamuša mielde ovddidit guovllu guolledoalu ja čázádagaid eará geavaheami. Foanda geavaha jahkásaččat 200 000 – 300 000 euro guollegieđahallanbáikkiid ja jiekŋamoallobáikkiid bajásdoallamii ja ovddideapmái, veajehiid gilvimiidda ja dutkan- ja ovddidanfidnuide.